германчуудын 61 хувь нь “НОМ БОЛ амьдралынх нь салшгүй нэг цул” гэж хариулжээ
Номыг аль болох багаас нь…”
(Ном унших нь шүдээ угаах мэт чухал!)
Жил бүрийн шинэ оны эхээр номын сан орж шинэ жилийн амралтын өдрүүдэд уншихаар авсан номнуудаа буцааж өгөөд өөр ном авдаг л даа. Энд сургуулийн хүүхдүүд энэ үеэр нэлээн олон хоног амардаг, энэ удаа жишээ нь 12 сарын 19-нөөс 1 сарын 11 хүртэл амарч байгаа юм. Тэр л хэвшлээр саяхан ойролцоох номын сан орлоо. Хүүхдийн хэсэгт нь овоо удлаа. Өмнө нь ном онгичоод завгүй байдаг хүн энэ удаад шонхор хамар, цайвар үстэй герман хүүхдүүдийг харж хэсэг суулаа даа. Оронд нь монгол хүүхдүүд байж байна гэж төсөөлж нэг үзэв. Германы хөлд ороогүй мөлхөө жаал хүртэл ном сугавчлаад харж, эргүүлээд тэмтрээд эгээ л үнэртэж үзэх нь холгүй суучих юм. Нөгөө “сургуультай юу аятай” гэдэг шиг. Ийм мөлхөө хийгээд цэцэрлэгийн насны хүүхдийн номнуудыг яг л гар хүрэхээр жижиг жижиг дөрвөлжин хөөрхөн амьтны хээ хуартай хайрцагт хийсэн байх. Арай том 6-гаас 9 настай хүүхдийн номын тавиурууд өндрөөрөө мөн л тийм. Өсвөр насны хүүхдийнх өндрөөшөө тавиуриуд нь томорсон байрлалтай. Номын санд түүнчлэн хүүхдийн хэл, сэтгэхүй хөгжүүлэх тоглоомуудыг нас насных нь ангиллаар өрчихсөн байх нь өнгө алаглаж харагдана.
…
